دول أئمة كبار من أئّمة التصوّف السنّي المنضبط بالقرآن والسنّة والشريعة المحمديّة.

طيب ليه بيذكروا حاجات زي الخمر والسكر في أشعارهم ؟ هي مش الخمرة حرام ؟

أيوة الخمرة حرام طبعًا، وهما مش بيدعو لشرب الخمر ولا بيقولوا أنه حلال زي ما فيه شوية ناس بتستغل كلامهم عشان تحلل الخمرة. الشعر كنوع من الأدب فيه أدوات بلاغية كتير زي اللي اتعلمناها في المدرسة: الكناية والاستعارة والتورية والحاجات دي. والشعر الصوفي مبني علي استخدام الأدوات البلاغية دي، زي أي شعر والرموز فيه كتير، فلما بيقولوا خمر وسكر هما بيقصدوا على حال معين من الانشغال بالله وحبه بيخليهم هيمانين فيه ومشغولين بيه، لكن مش بيقصدوا الخمرة نفسها ده أكيد.

طيب هل هما بيقولوا ان الاديان كلها دين واحد ومافيش فرق بين دين ودين ؟

لا هما مش بيقولوا كده خالص، زي ما قلت في الأول هما على عقيدة أهل السنة والجماع ة، لكن المشكلة إن كلامهم مش بيتفهم صح وبالتالي القارئ بيعمل قناعات شخصية عن الكلام ويصدرها علي أن ده المقصود من اللي قالوه.

طيب ليه مش بتشرح أمثلة من الكلام ده علشان نفهم ؟

عشان كلامهم ده مستوى عالي شويتين، ومش مفروض يتعرضله إلا اللي عنده فهم كويس في أصول الدين وفي العقيدة وفي التصوف، ومشايخ كتير كانوا مابيخلوش تلاميذهم يقروا كتبهم لحد ما يتأكدوا أنهم هيفهموه صح.

طيب أنت شايف الجدال اللي طالع حواليهم سببه إيه ؟

عشان اللي بينشر كلامهم وبيسوقه بيعمل كده لمصلحة شخصية غالبًا، دلوقتي بقينا نسمع كلمة Rumi كأنها brand بيتعمل حواليه تجارة وشغل كويس. وعلشان يعرف يعمل كده لازم يتغاضى عن ذكر أنهم كانوا من أهل السنة ومشتغلين بالقرآن والحديث والطاعة لله، وأنهم كانوا اشد الناس تمسك بالدين، علشان ال brand identity اللي بانيها حواليهم مبنية علي حالة من الروحانية مافيهاش أي قيود ولا ضوابط شرعية.

معلش حاول تبسط الكلام ده تاني علشان اتأكد أني فاهمك صح ؟ من الآخر اللي عايز يعمل سبوبة من سيدي الرومي وسيدي ابن عربي مش هيعرف يكسب لو قال للناس هما كانوا عاملين إزاي بجد، فبيصور صورة عنهم ناقصة و ش مطابقة للحقيقة علشان يعرف يشتغل.

شارك المحتوي