مدد يعني أعطنا ممّا أعطاك الله سبحانه وتعالى، يعني ربّنا مديك حاجة إحنا عايزين منها شوية.

طيب هو سامعنا اللي بنقولوا مدد ده ؟

أيوة سامعنا، الموت انتقال من الدنيا لمكان تاني اسمه البرزخ، والبرزخ ده مكان اوسع من الدنيا بكتير وأرواح الصالحين بيكون ليها فيه من الادراك اللي ماكنش عندها في الدنيا.

طيب ليه بنطلب منهم مش من ربنا ؟

كل طلب في الحقيقة هو من ربنا، وربنا حط في الدنيا أسباب لكل حاجة بنحتاجها. لما بنعوز نجيب دواء بنطلبه من الصيدلي، لما بنعوز نأكل بنطلب أكل من المطعم، لما بنعوز نروح حتة بنركب وسائل مواصلات، وعمرنا ما حسينا أن فيه مشكلة.

طيب ليه بنحس إن فيه مشكلة في ده بالذات؟

علشان ماتعلمناش نفهم الموت صح، وافتكرنا أن الموت ده فناء وبالتالي طلبنا من الحي ليه معنى، وطلبنا من المنتقل مالوش معنى، ولو فهمنا الموت صح هنرتاح ومش هيكون عندنا مشكلة.

طيب مين قال ان الصالحين عندهم حاجة يديهولنا ؟

ربنا اللي قال "
لَهُم مَّا يَشَاءُونَ عِندَ رَبِّهِمْ ۚ ذَٰلِكَ جَزَاءُ الْمُحْسِنِينَ"، فلما تطلب منهم حاجة هما بيطلبوها من ربنا وهو بيديهالهم، زي ما تطلب من أمك تدعي لك كده علشان ربنا بيستجيب دعاها.

طيب احنا بنطلب منهم ايه بالضبط ؟

بنطلب نور في القلب من النور اللي عندهم، وفهم عن الله من الفهم اللي عندهم، واستقامة علي طريق الله من الاستقامة اللي عندهم، وحب لله ورسوله من الحب اللي عندهم.

طيب هو اللي عايز يكون صوفي لازم يعمل كده ؟

لا مش لازم ولا حاجة، بس هو لو مشي شوية في طريق التصوف هيلاقي نفسه لوحده بيعمل كده، علشان لما بصيرته تنكشف شوية هيشوف ربنا أدى الأولياء إيه وحياتهم البرزخية عاملة إزاي.

شارك المحتوي